Ապրիլի 7-ին, Մայրության և գեղեցկության օրը Սևան համայնքի ղեկավար Սարգիս Մուրադյանը սևանցի հերոսների մայրերին, կանանց, քույրերին հրավիրել էր Սևանի բիզնես կենտրոն «Նվիրում» խորագրով հանդիպում-միջոցառմանը:
Հրավիրված էին Արցախյան բոլոր պատերազմներում որդիներ և ամուսիններ կորցրած մայրեր ու կանայք, ազտամարտիկ կանայք Սևան համայնքից:
Սևան համայնքի ղեկավար Սարգիս Մուրադյանը շնորհավորեց հերոսների մայրերին ու կանանց «Մայրության և գեղեցկության օրվա» առթիվ՝ մաղթելով խաղաղություն, ներդաշնակ կյանք, գնահատված ու սիրված լինելու մեծագույն բերկրանք և երջանկություն:
-«Այսօրը ևս մեկ պատեհ առիթ է երախտիքի խոսքեր հղելու մեր մայրերին ու կանանց, որոնք հայրենիքին տվեցին ամենաթանկը: Հերոսներ ծնած ու դաստիարակած մայրեր, քույրեր, պատերազմի դաշտում թանկ կորուստներ տված կանայք. Խոնարհվում ենք ձեր կամքի, մեծագույն ուժի առաջ: Շնորհակալություն, որ այստեղ եք: Համայնքային իշխանությունը Ձեր կողքին է, մենք պատրաստակամ ենք Ձեր ցանկացած խնդրին օժանդակելու և լուծում տալու, Ձեր կողքին լինելու: Սփոփանքի ոչ մի խոսք չի կարող մեղմել այն ցավը, որ կրում եք Ձեր սրտում: Սակայն թուլ տվեք այս փոքրիկ ուշադրությամբ շնորհավորելուց զատ ասել նաև ՇՆՈՐՀԱԿԱԼՈՒԹՅՈՒՆ…»,-իր խոսքում նշել է համայնքի ղեկավար Սարգիս Մուրադյանը:
Ապրիլի 7-ի կապակցությամբ Սևան համայնքի Վ. Ստեփանյանի անվան կենտրոնական գրադարանը ձևավորել էր գեղեցիկ ցուցահանդես «Կնոջ դերը պատմության մեջ» խորագրով։
Մայրության և գեղեցկության օրվա առթիվ Սևանի Ս. Զաքարյանի անվան համայնքային մշակույթային կենտրոնում անցկացվեց «Զարթոնք. մայրություն» խորագիրը կրող ցուցահանդես և համերգային ծրագիր` Սևան համայնքի մշակութային հաստատությունների սաների հեղինակությամբ:
Համերգային ու պարային ելույթներով հանդես եկան Լճաշենի մանկական արվեստի կենտրոնի, Սևանի Հովհ. Այվազովսկու անվան արվեստի դպրոցի, Համայնքային մշակութային կենտրոնի պարային խմբերն ու սաները:
Ներկայացված էին Սևան համայնքի մշակութային հաստատությունների սաների ձեռքի աշխատանքները:
Ըստ Հայ առաքելական եկեղեցու տոնացույցի ապրիլի 7-ը Սուրբ Աստվածածնի Ավետման օրն է։ Այդ օրը բոլոր եկեղեցիներում Ս. Պատարագ է մատուցվում, որպես մայրերի և մայրության բերկրանքին սպասող կանանց օրհնության օր։
