Մարտի 31-ին «Մանկապատանեկան Գրքի շաբաթվան» նվիրված բազմաբովանդակ միջոցառմանը Լճաշենի դպրոց էին
այցելել բազմաթիվ մանկագիրներ, գրականագետներ, գրողներ՝ Հայաստանի գրողների միության նախագահ
Էդվարդ Միլիտոնյանի գլխավորությամբ: Ներկա էին նաև Գեղարքունիքի մարզպետի աշխատակազմի Կրթության,
մշակույթի և սպորտի վարչության կրթության բաժնի պետ Համբարձում Սաֆարյանը, Լճաշեն բնակավայրի վարչական
ղեկավար Վահան Մարգարյանը, Սևանի համայնքապետարանի Կրթության, մշակույթի, սպորտի և երիտասարդության
հարցերի բաժնի աշխատակիցներ, Աշոտ Տեր-Գրիգորյանի դուստրը՝ բանասիրական գիտությունների թեկնածու,
դոցենտ Լիլիթ Տեր -Գրիգորյանը և այլ հյուրեր: Լճաշենի դպրոցը մեծ պատասխանատվությամբ էր պատրաստվել օրվա
առթիվ և հյուրերին ներկայացավ հետաքրքիր միջոցառումների շարքով: Հյուրերին դիմավորեց՝ խորհրդանշական
տարբերանշանները հյուրերի կրծքին փակցնելով, դհոլահարների խմբի ելույթով: Թումանյանի անվան դասասենյակում
հյուրերին սպասվում էր «Հեքիաթապատում»: Երեխաները բեմադրեցին թշ Հովհ. Թումանյանի հեքիաթները: Կոմիտասի
անվան դասասենյակում «Փոքրիկ երգիչներ» երգչախմբի կատարմամբ հյուրերն ունկնդրեցին «Կաքավիկը» երգը: Բացման
խոսքով հանդես եկավ դպրոցի տնօրեն Աիդա Մուրադյանը: Ներկայացնելով հյուրերին՝ Աիդա Մուրադյանը, կարևորելով
օրվա խորհուրդը, նշեց, որ մեծ պատիվ է, որ «Մանկապատանեկան Գրքի շաբաթ»-ն այս տարի մեկնարկում է Լճաշենի
դպրոցից, ինչի համար շնորհակալություն հայտնեց նախաձեռնության համար: Հայաստանի Գրողների միության նախագահ
Էդվարդ Միլիտոնյանի կարծիքով, «Մանկապատանեկան գրքի շաբաթ»-ը կնպաստի գիրք կարդալուն, իսկ ժամանակակից
մանկագիրները հնարավորություն կունենան ներկայանալ հանրությանը, հատկապես երեխաներին:
Մանկական գրականությունը պետք է պահել հասարակության ուշադրության կենտրոնում, քանի որ դրանից է սկսվում
երեխայի հոգևոր կյանքը եւ դաստիարակումը,-նշեց Էդվարդ Միլիտոնյանը: «Մանկապատանեկան Գրքի շաբաթ»
անցկացնելու նպատակն է ժամանակակից մանկական գրականությունը հասցնել
մատաղ սերնդին, հանդիպումներ կազմակերպել մանկագիրների եւ ընթերցողների միջև: Երեխաները ծանոթացան
ժամանակակից մանկագիրների ստեղծագործություններին, ուղղեցին հարցեր հյուրերին և խոստացան, որ կշարունակեն
օգտվել դպրոցի հարուստ գրադարանից, անպայման կկարդան նաև նոր մանկական գրքերը, որոնք համալրեցին դպրոցի
գրադարանը: Ողջույնի խոսքով հանդես եկավ Գեղարքունիքի մարզպետի աշխատակազմի Կրթության, մշակույթի և
սպորտի վարչության կրթության բաժնի պետ Համբարձում Սաֆարյանը, ով կարևորեց գրքի և ընթերցանության դերը
մատաղ սերնդի դաստիարակության գործում, միաժամանակ փոխանցեց մարզպետ Կարեն Սարգսյանի ողջույնները և
նշեց, որ մարզային և տեղական իշխանություններն ամեն ինչ անում են, որ դպրոցներում լավագույն հիմքերի վրա դրվի
հատկապես ընթերցանությունը, ինչը կծառայի սերունդների մեջ գրքի և ընթերցանության հանդեպ սեր արմատավորելուն:
Ողջույնի խոսքով հանդես եկան նաև Հայաստանի գրողների միության Գեղարքունիքի մարզային բաժանմունքի ղեկավար,
արձակագիր Տիգրան Նիկողոսյանը, Գրողների միության մանկական գրականության բաժանմունքի ղեկավար, մանկագիր
Անուշ Վարդանյանը, մանկագիրներ Սաթենիկ Ղազարյանը և ուրիշներ, ոքեր իրենց խոսքում կարևորեցին գրքի և
ընթերցանության դերը մատաղ սերնդի դաստիարակության գործում, ինչպես նաև դպրոցի աշակերտներին ներկայացրին
իրենց մանկական ստեղծագործությունները, որոնք մեծ սիրով նվիրեցին դպրոցին: Գրողները հույս հայտնեցին, որ այսուհետ
մանկական գրականությունը մշտապես կլինի հասարակության ուշադրության կենտրոնում, ոչ թե տարին միայն մեկ
շաբաթ:
Դպրոցի «Տիկնիկային թատրոն»-ի սաներն էլ իրենց ուսումնական խմբի ղեկավարի հետ բեմականացրին Հովհ.
Թումանյանի «Անխելք մարդը» հեքիաթը: Հետաքրքիր ու բովանդակալից միջոցառումների շարքը, «Ծաղկած Բալենի»
քանոնի կատարումը ևս մեծ բավականություն պատճառեցին ներկաներին: «Նվիրյալներ» Ռազմամարզական
հասարակական կազմակերպության հետ ակտիվ համագործակցության համար,
հասարակական կազմակերպության ղեկավար Արման Գրիգորյանի կողմից Լճաշենի դպրոցի տնօրեն Աիդա Մուրադյանը
պարգևատրվեց շնորհակալագրով: Մանկապատանեկան գրքի շաբաթվա փակման արարողությունը տեղի կունենա ապրիլի
7-ին՝ Երևանի Խնկո-Ապոր գրադարանում:
