GEGHAMA MEDIA HOLDING

0 Ավանդույթի համաձայն` յուրաքանչյուր տարվա փետրվար ամսին համայնքներում տեղի են ունենում մարզամշակութային միջոցառումներ, որոնք համախմբում են մարզիկներին ու մարզասերներին` նպաստելով սպորտի մասսայականացմանը, առողջ ապրելակերպի ձևավորմանը: Այս տարի էլ` փետրվարի 13-ին, Սևանը միացավ «Գեղարքունյաց Ձմեռ-2025» մարզամշակութային տոնակատարությանը` «Լինենք առողջ» խորագրով: Միջոցառմանը մասնակցում էին Սևան համայնքի հանրակրթական դպրոցների, Ն. Դագարյանի անվան մանկապատանեկան մարզադպրոցի աշակերտներն ու սաները, մարզասերներ, բնակիչներ: Ս. Զաքարյանի անվան մշակույթի պալատի հարակից տարածքում տոնակատարությունը մեկնարկեց ցուցադրական ելույթներով. հանդես եկան «Նվիրյալներ ռազմամարզական» ՀԿ-ի թաեքվոնդոյի խմբի սաները (մարզիչ՝ Արման Գրիգորյան): Իրենց մարզական կարողությունները ցուցադրեցին Սևանի Ն. Դագարյանի անվան մանկապատանեկան մարզադպրոցի բռնցքամարտիկները (մարզիչներ՝ Հովհաննես Վարդանյան, Անդրանիկ Քամալյան): Ցուցադրական ելույթներին հաջորդեցին նախապես հայտարարված մարզա և խաղաձևերից անցկացվող մրցումները՝ անհատական և թիմային ձևաչափերով: Հետաքրքիր և լարված մրցումները գնահատվեցին մրցավարների կողմից, որին հաջորդեց արդյունքների ամփոփումը: Անցկացված մարզա և խաղաձևերի արդյունքներն այսպիսին են՝ Կշռաքարի բարձրացում – 1-ին մրցանակային տեղը գրավեց Ն. Դագարյանի անվան մանկապատանեկան մարզադպրոցի սան Արման Ղազարյանը, 2-րդ մրցանակակիր դարձավ Սևանի համայնքի Չկալովկա բնակավայրի միջնակարգ դպրոցի աշակերտ Արմեն Մալխասյանը, 3-րդ տեղը զբաղեցրեց Լճաշեն բնակավայրի միջնակարագ դպրոցի աշակերտ Նվեր Սանամյանը: Պարանի ձգում – 1-ին տեղն է գրավել Չկալովկա բնակավայրի միջնակարգ դպրոցի, 2-րդ տեղը` Սևանի թիվ 5 միջնակարգ դպրոցի, 3-րդ տեղը` Սևանի թիվ 4 հիմնական դպրոցի թիմերը: Ազգային կոխ – 1-ին տեղ` Կարեն Գալստյան (Վլ. Կարապետյանի անվան թիվ 3 հիմնական դպրոց), 2-րդ տեղ` Արծրուն Հայրապետյան (Վլ. Կարապետյանի անվան թիվ 3 հիմնական դպրոց) 3-րդ տեղ` Գոռ Մարգարյան (Յա. Զարոբյանի անվան թիվ 2 հիմնական դպրոց)։ Նետում նշանակետին մրցաձևի 1-ին մրցանակակիրը Լևոն Վարդանյանն էր (թիվ 4 հիմնական դպրոց), 2-րդը՝ Ռոզա Կատվալյանը (Վլ․ Կարապետյանի անվան թիվ 3 հիմնական դպրոց), 3-րդ տեղը զբաղեցրեց Սիլվի Մարտիրոսյանը (Վլ․ Կարապետյանի անվան թիվ 3 հիմնական դպրոց)։ Մինի ֆուտբոլ մարզաձևում լավագույն եռյակն այսպիսին էր` 1-ին մրցանակային տեղ` Վլ․ Կարապետյանի անվան թիվ 3 հիմնական դպրոցի թիմ, 2-րդ տեղ` Լճաշենի միջնակարգ դպրոց, 3-րդ տեղ` Սևանի թիվ 4 հիմնական դպրոց: Վոլեյբոլ մարզաձևի և նարդի խաղի մրցումներն անցկացվեցին Սևանի Ն. Դագարյանի անվան մանկապատանեկան մարզադպրոցում: Վոլեյբոլ մարզաձևում աղջիկների լավագույն թիմը մարզադպրոցի թիմն էր, երկրորդ մրցանակային տեղը զբաղեցրեց Խ. Աբովյանի անվան ավագ դպրոցի թիմը, 3-րդ տեղը զբաղեցրեց Սևանի թիվ 5 միջնակարգ դպրոցի աղջիկների թիմը: Վոլեյբոլի՝ տղաների մրցապայքարում առաջին մրցանակային տեղը զբաղեցրեց Սևանի թիվ 5 միջնակարգ դպրոցի թիմը, երկրորդ մրցանակակիր դարձավ Խ. Աբովյանի անվան ավագ դպրոցի թիմը, լավագույն եռյակը եզրափակել է Չկալովկա բնակավայրի միջնակարգ դպրոցի թիմը: Նարդի խաղաձևում մրցանակակիր դարձավ Սևան համայնքի բնակիչ Արամ Բարսեղյանը, երկրորդը Ն. Դագարյանի անվան մանկապատանեկան մարզադպրոցի աշխատակից Էդուարդ Սիմոնյանն էր, երրորդ մրցանակային տեղը գրավեց Սևան համայնքի բնակիչ Գերասիմ Կիրակոսյանը: Հրաձգության մրցումներն անցկացվեցին ՈՄԱ մարզասրահում: Առաջին մրցանակային տեղը զբաղեցրեց Սևանի թիվ 2 միջնակարգ դպրոցի աշակերտ Նարեկ Քառյանը, 2-րդ մրցանակակիր է դարձել Լճաշեն բնակավայրի միջնակարգ դպրոցի աշակերտ Արսեն Պողոսյանը, լավագույն եռյակը եզրափակել է Սևանի թիվ 2 միջնակարգ դպրոցի աշակերտ Դավիթ Ստեփանյանը: Յուրաքանչյուր մարզա և խաղաձևից մրցանակային տեղեր զբաղեցրածները և լավագույն մասնակցություն դրսևորած հաստատությունները խրախուսվեցին Սևան համայնքի ղեկավարի հավաստագրերով և շնորհակալագրերով: «Գեղարքունյաց Ձմեռ-2025» մարզամշակութային տոնակատարության մասնակից լավագույն ուսումնական հաստատություն ճանաչվեց Վլ․ Կարապետյանի անվան թիվ 3 հիմնական դպրոցը: Այս ուսումնական հաստատության աշակերտները մրցանակային տեղերի գրավման քանակով առաջինն էին:  «Գեղարքունյաց Ձմեռ-2025» մարզամշակութային տոնակատարությունը շարունակվեց Սևանի Սրբոց Հրեշտակապետաց եկեղեցու բակում, որտեղ «Սևան» երիտասարդական ակումբ» ՀԿ-ի նախաձեռնությամբ նշվեց Տեառնընդառաջի նախօրեն: Ներկաները պարուսույց Գոհար Ղազարյանի հետ սովորեցին ազգագրական պարեր և պարեցին խարույկի շուրջ: Փետրվարի 13-ին Տեառնընդառաջի նախատոնակի արարողություն  անցկացվեց Սևան համայնքի Դդմաշեն բնակավայրում վարչական ղեկավար Գարիկ Ներսիսյանի նախաձեռնությամբ: Մասնակցում էին «Գագարին»  նախագծի գործընկերները, մանկական երգչախումբը, «Մխիթար Սեբաստացի» կրթահամալիրի ուսուցչական ծիսական երգչախումբը: Փետրվարի 13-ը տոն դարձավ հրավիրված մեկ տասնյակից ավել նորապսակ զույգերի համար։ Դդմաշեն գյուղի Սուրբ Թադևոս եկեղեցում ծեսի նախատոնակով` Տեր Նարեկ քահանա Այվազյանն օրհնությամբ միավորեց բոլորին և որպես տոնի նվեր, Սևան խոշորացված համայնքի և Դդմաշենի վարչական ղեկավարների նախաձեռնությամբ  նորապսակներին ընծայվեց  Գրիգոր Նարեկացու աղոթագրքեր։