GEGHAMA MEDIA HOLDING

0 Փետրվարի 12-ին տեղի ունեցավ Սևան համայնքի ավագանու այս տարվա առաջին նիստը: Այն վարեց Սևան համայնքի ղեկավար Սարգիս Մուրադյանը։ Նախքան օրակարգային հարցերին անցնելը, համայնքի ղեկավարը նշեց, որ տնտեսող քաղաքականության, քրտնաջան աշխատանքի շնորհիվ 2024 թ-ը ամփոփել ենք բյուջեի սեփական եկամուտների  103.6 % գերակատարմամբ, առանց պարտքերի: Արդյունքները գոհացուցիչ են և համայնքը առաջ է շարժվում 2022-2026  հնգամյան զարգացման ծրագրին համահունչ: Սևան համայնքի ղեկավարը նաև շնորհակալություն հայտնեց աշխատակազմին և ավագանու անդամներին կատարած աշխատանքի համար: Օրակարգային առաջին հարցով ավագանին լսեց  Սևան համայնքի 2024 թվականի բյուջեի կատարման և 5-ամյա զարգացման ծրագրի`2024 թվականին կատարված աշխատանքների հաշվետվությունը և հաստատեց այն: Սարգիս Մուրադյանն ընդգծեց 2024թ-ի կապիտալ ծախսերի ծավալը, ինչպես նաև հատուկ անդրադարձավ համայնքում իրականացվող աղբահանությանը և վճարներին: Համայնքում իրականացվում են աղբահանության մեծածավալ աշխատանքներ, սակայն վարձավճարների հավաքագրումը գոհացուցիչ չէ: Սարգիս Մուրադյանը կոչ արեց ազգաբնակչությանը մարել աղբահանության դիմաց կուտակված պարտքերը: Սևան համայնքի ավագանին փոփոխություն կատարեց Սևան համայնքի ավագանու՝ 2024 թվականի դեկտեմբերի 17-ի՝ «Սևան համայնքի 2025 թվականի բյուջեն հաստատելու մասին» N170-Ն և Սևան համայնքի ավագանու 2021 թվականի դեկտեմբերի 24-ի N 5-Ա որոշումների մեջ, որոնցով Սևան համայնքի ավագանու կանոնակարգը հաստատվեց նոր՝ օրինակելի խմբագրությամբ: Ավագանին հաստատեց Սևան համայնքի 2025 թվականի տարեկան աշխատանքային պլանը (ՏԱՊ), որով նախատեսվում է ևս 7 նոր ծրագրեր իրականացնել: Այս տարի ևս կիրականացվեն սուբվենցիոն ծրագրեր համայնքի բնակավայրերում և Սևան քաղաքում: Սևան համայնքի ղեկավարի և ավագանու համապատասխան որոշումներով կմեկնարկի 2025 թվականի մասնակցային բյուջետավորման գործընթացը: Համայնքի ղեկավարի որոշմամբ կստեղծվի բյուջետավորման գործընթացի կառավարման հանձնաժողով, կհստակեցվի և կհաստատվի վերջինիս կազմն ու լիազորությունները, աշխատակարգը, առաջարկ-նախագծերի ներկայացման հայտի և նախնական գնահատման աղյուսակի ձևաթղթերը, ինչպես նաև մասնակցային բյուջետավորման գործընթացի իրականացման ժամանակացույցը։ Շնորհիվ ստեղծված հնարավորության՝ համայնքի բնակիչները հնարավորություն ունեն համայնքապետարանի հետ համագործակցելով բարելավելու իրենց բնակավայրը, ավելի հարմարավետ և գրավիչ դարձնելու համայնքի կյանքը՝ իրացնելով իրենց՝ տեղական ինքնակառավարմանը մասնակցելու իրավունքը։  Մասնակցային բյուջետավորումը համայնքի բնակիչներին հուզող խնդիրները հավաքելու համակարգ է, լուծումների միասնական որոնման միջոց: Սևան համայնքի ավագանին սահմանեց Սևան համայնքի բնակավայրերի վարչական տարածքում գտնվող գյուղատնտեսական նշանակության հողատարածքների՝ 2025 թվականին օգտագործման տրամադրվող վարելահողերի, արոտավայրերի եվ խոտհարքերի համար մրցութային մեկնարկային գինը, հաստատեց  Սևան համայնքի սեփականություն հանդիսացող հողերի կառավարման 2025 թվականի (ամենամյա) ծրագիրը՝ թողնելով դրանք նույնը: Ավագանու որոշմամբ Սևան համայնքի Սեմյոնովկա բնակավայրում գտնվող օրվա կարգավորիչ ջրամբարի (ՕԿՋ) և կապտաժի կառուցման համար նախատեսված հողատարածքը նվիրատվությամբ հանձնվեց  պետությանը: Փոփոխություն կատարվեց նաև «Սևան համայնքի Դդմաշեն բնակավայրի մանկապարտեզ» ՀՈԱԿ-ի կանոնադրության մեջ՝ պայմանավորված նախորդ տարի ավագանու որոշմամբ մանկապարտեզում մեկ խմբի ավելացմամբ: Ավագանին հաստատեց նաև Սևանի համայնքապետարանի, համայնքային ոչ առևտրային կազմակերպությունների և Սևանի բիզնես կենտրոնի 2024 թվականի գույքագրման արդյունքները: Ավագանու կողմից հաստատվեցին Սևան համայնքի տեղական ինքնակառավարման մարմնում տեղական հակակոռուպցիոն միջոցառումների ծրագիրը և Սևան համայնքում սոցիալական աջակցության տրամադրման չափորոշիչներն ու ծրագրերը: Ավագանու որոշմամբ Կոտայքի կոշտ կենցաղային թափոնների ծրագրի հանձնաժողովում Սևան համայնքի կողմից լիազորված անձ նշանակվեց Էդգար Հարությունյանը: Սևան համայնքի ղեկավար Սարգիս Մուրադյանը տեղեկացրեց, որ շուտով կտրվի ապակենտրոնացված նոր հարաբերությունների մեկնարկ Հունգարիայի Բալատոն լճի ափին գտնվող Բալատոնալմադի քաղաքի հետ: Սևան համայնքի ավագանու հաջորդ նիստը տեղի կունենա մարտին: Նիստի վերջում ավագանին քննարկեց քաղաքացիներից և իրավաբանական անձանցից ստացված դիմումները: