Գեղամա Հեռուստաընկերություն » ՍԵՎԱՆ ՀԱՄԱՅՆՔԻ ՂԵԿԱՎԱՐ ՍԱՐԳԻՍ ՄՈՒՐԱԴՅԱՆԻ ՈՒՂԵՐՁԸ ՀԱՅՈՑ ԲԱՆԱԿԻ ԿԱԶՄԱՎՈՐՄԱՆ 33-ՐԴ ՏԱՐԵԴԱՐՁԻ ԱՌԹԻՎ
ՍԵՎԱՆ ՀԱՄԱՅՆՔԻ ՂԵԿԱՎԱՐ ՍԱՐԳԻՍ ՄՈՒՐԱԴՅԱՆԻ ՈՒՂԵՐՁԸ ՀԱՅՈՑ ԲԱՆԱԿԻ ԿԱԶՄԱՎՈՐՄԱՆ 33-ՐԴ ՏԱՐԵԴԱՐՁԻ ԱՌԹԻՎ
Հեղինակ` SevanTV1 ամսաթիվ` 28-01-2025, 12:53, դիտել են` 26
0
ՍԵՎԱՆ ՀԱՄԱՅՆՔԻ ՂԵԿԱՎԱՐ ՍԱՐԳԻՍ ՄՈՒՐԱԴՅԱՆԻ ՈՒՂԵՐՁԸ ՀԱՅՈՑ ԲԱՆԱԿԻ ԿԱԶՄԱՎՈՐՄԱՆ 33-ՐԴ ՏԱՐԵԴԱՐՁԻ ԱՌԹԻՎ Սիրելի հայրենակիցներ, Սևան համայնքի հարգելի բնակիչներ Շնորհավորում եմ բոլորիս հայ ժողովրդի նվիրական տոնի՝ Հայոց բանակի կազմավորման 33-րդ տարեդարձի առթիվ: Հայոց բանակի ստեղծումը մեր նորագույն պատմության լրջագույն ձեռքբերումներից է, մեր պետականության կարևորագույն նվաճումը: Այն ստեղծվեց հազարավոր հայորդիների կամքի, անձնազոհության ու նվիրումի շնորհիվ, անցավ փորձություններով լի ճանապարհ, սրբագործվեց հայորդիների հերոսացմամբ: Հայոց բանակն ազգային միասնականության խորհրդանիշն է, որը դարձել է պատասխանատու, հայրենասեր քաղաքացու դաստիարակման դարբնոց: Բանակը մեր անցաթուղթն է և լինելության վավերագրերից մեկը: Երեքտասնամյակից ավելի Հայոց բանակը դարձել է մեզանից յուրաքանչյուրի անբաժանելի մասը, մեր հպարտության և արժանապատվության երաշխավորը: 2020թվականի սեպտեմբերի 27-ին սանձազերծված պատերազմում էլ Հայոց բանակին զինվորագրված 18-20 տարեկան մեր տղաները, ՀՀ Զինված ուժերում իրենց ծառայությունն իրականացնող սպաներն ու հրամանատարները կրեցին պատերազմի ողջ ծանրությունը։ Սևան համայնքը 44-օրյա պատերազմի ընթացքում և դրանից հետո էլ թշնամու սանձազերծած ագրեսիայի հետևանքով դեպի անմահություն ճանապարհեց հերոսներին, Հայոց բանակին հավերժ զինվորագրված մեր սուրբ նահատակներին: Հավերժ փառք և խոնարհում մեր լուսավոր տղաների հիշատակի առաջ: Բանակը կենդանի օրգանիզմ է` իր առանձնահատկություններով և պահանջներով, ու յուրաքանչյուր զինվոր ոչ միայն հայրենիքի պաշտպանն է, այլ, նախևառաջ, մեր բանակի կայացման, ամրապնդման երաշխավորը: Այս օրերին շարունակվում է ձմեռային զորակոչը, և սևանցիները բանակ են ճանապարհում իրենց որդիներին, ճանապարհում են` մաղթելով անփորձանք ու խաղաղ ծառայության, բարի վերադարձ: Հարգելի հայրենակիցներ Իմ, համայնքի ղեկավարի աշխատակազմի, բնակավայրերի վարչական ղեկավարների և համայնքի ավագանու անունից շնորհավորում եմ բոլորիս այս նվիրական տոնի առթիվ: Հայոց բանակի կազմավորման 33-րդ տարեդարձի առթիվ շնորհավորում եմ հայ զինվորին, նրան, որն օրեր առաջ է համալրել Հայոց բանակի շարքերը` իր հետ տանելով մեր բարեմաղթանքներն ու օրհնանքները, նրան, որն արդեն հաղթահարել է բանակային կյանքի բոլոր դժվարությունները և հպարտորեն է կրում իր կոչումը, նրանց, որոնք իրենց երկամյա ծառայությունը պատվով կատարած վերադարձել են կամ օրեր անց կվերադառնան տուն: Շնորհավորանքներս եմ հղում բանակաշինության պատասխանատու գործի ակունքներում կանգնած և Հայաստանի զինված ուժերում իրենց կենսագրությունը գրող անձանց, սպային ու հրամանատարին` մաղթելով խաղաղ ու անվտանգ ծառայություն: Շնորհավորում եմ զինվորների ծնողներին ու հարազատներին` մաղթելով համբերություն, հոգեկան խաղաղություն: Մեր պետությունը կանգնած է բարդ մարտահրավերների առջև, ու գերակա են անվտանգային հարցերը: Վստահ եմ, որ միասնաբար ու համատեղ ուժերով մենք կարող ենք դիմակայել ցանկացած դժվարության` թիկունք կանգնելով Հայոց բանակին: Հայրենիքը մեր սիրո ու ուշադրության կարիքն ունի, և Հայոց բանակի մարտունակությամբ մեր հայրենիքը կդառնա առավել հզոր ու կայացած: Մեր պետականությունը պաշտպանելու հրամայականը պետք է դառնա յուրաքանչյուրիս հայրենանվեր աշխատանքի առանցքը, մեր համախմբումն ու միասնությունն էլ պետք է ուժ տան հայոց բանակին` այն դարձնելով առավել ուժեղ ու կայացած: Սիրելի հայրենակիցներ, Շնորհավորում եմ բոլորիս հայ ժողովրդի համար կարևորագույն այս տոնի կապակցությամբ: Փառք Հայոց բանակին, բանակաշինության նվիրյալներին և զինծառայողներին: Աստված պահապան մեր բանակին և զինվորներին:
Խումբ` ---
Հարգելի այցելու, դեւք մտել եք կայք առանց գրանցվել:
Մենք խորհուրդ ենք տալիս Ձեզ գրանցվել կամ մտնել Ձեր մուտքանունով:
Մենք խորհուրդ ենք տալիս Ձեզ գրանցվել կամ մտնել Ձեր մուտքանունով:
